Најстарата панда на светот е eвтаназирана во забавниот парк во Хонг Конг каде што живеела, бидејќи ѝ се влошило здравјето.

Управата на „Оушн парк“ соопштила дека 39-годишна панда Џа Џа е убиена од милост за да не страда, но и од етички причини.

Пандата Џа Џа влезе во Гинисовата книга на рекорди како најстара панда во заточеништво. Просечен животен век на пандите во дивина е од 18 до 20 години, а во заточеништво околу 30 години.

Последниот роденден го прославила во август, а во последно време покажувала знаци на старост и слабо здравје, вклучувајќи висок крвен притисок и артритис.

Вo текот на изминатите две недели нејзината состојба значајно се влошила, престанала да јаде и изгубила на тежина.

Пандите, симбол на Кина, долго се сметани за најзагрозените животни на светот.

Меѓународното здружение за зачувување на природата минатиот месец соопшти дека тој вид сега е „ранлив“ и дека благодарение на напорите на нејзиното зачувување, популацијата на дивата панда пораснала од 1.596 во 2004 година до 1.864 во 2014 година.